5間中式糖水店推介 九龍城著名潮州糖水、香濃芝麻燉鮮奶

「食完飯不如去食碗糖水囉」係唔少香港人嘅飯後習慣，有時同朋友傾唔夠，坐低食碗糖水繼續傾就最啱喇！趁而家秋風起，食返中式糖水就最滋潤。其中呢幾間精選中式糖水店，如懷舊老字號甜品店、融合香港同台灣特色嘅糖水店等都係私藏名單嘅Top 5呀。

特色潮州糖水 潮州合成甜品

呢間老字號潮式糖水店都街知巷聞，唔少人喺九龍城食完飯都一定會去食返碗糖水先！好似蓮子清心丸綠豆爽、椰汁黑糯米同馬蹄沙等都係必叫，蓮子清心丸綠豆爽有沙沙地嘅口感，清爽香甜又綿密，最重要係清心丸，口感煙煙韌韌，愈食愈上癮～另外腐竹糖水配清心丸都好夾。而椰汁黑糯米嘅黑糯米口感軟靭，加埋椰汁食好香，又唔會太甜！

馳名中式糖水店 地茂館甜品

同樣係來自九龍城嘅老字號甜品，不過而家已經開到有幾間分店，早排九龍城店亦全新裝修，除咗有傳統中式糖水，仲有唔少芒果甜品添～如芒果涼粉小丸子，芒果食落香甜，涼粉同小丸子都份量十足，好抵食。想健康啲可以食合桃露，生磨合桃味道好香醇，充滿堅果香。完全唔會過甜。軟滑糖不甩亦係另一招牌，丸子夠軟身唔溶爛，花生碎同糖粉令口感同味道都更豐富。

香濃芝麻糊鮮奶 華園甜品專家

曾獲得米芝蓮推介嘅甜品店，主打各款中式甜品，如薑汁燉雞蛋、芝麻糊及蛋白燉鮮奶等。芝麻燉鮮奶都好受歡迎，坊間食嘅芝麻燉鮮奶都係喺上面淋上芝麻糊，但呢個係將滿滿嘅芝麻糊注入燉鮮奶，鮮奶同芝麻香氣都好濃好夾。薑汁燉雞蛋燉蛋嫩滑，薑汁濃度適中，有時愈簡單嘅食物就愈好食呀。

舊式糖水店 永康甜品店

非常受街坊歡迎嘅舊式糖水店，裝修同牆上面嘅餐牌都好有懷舊味道，糖水選擇唔多都係最基本嘅傳統糖水～如而家已經唔係周圍見到嘅花生麥米粥，好足料，花生好大粒又煲到好腍，麥米又好好咬。紅棗圓肉百合蓮子淮山玉竹糖水啱晒女仔食，好養生呀。另外一提店舖只賣熱糖水～

港式 X 台式 深深甜品

呢間糖水店就新式啲，主打港式同台式糖水，必試鮮製椰子糊，從椰子內取出椰子肉，再加入椰汁、牛奶同糖等熬製成糊狀，椰香撲鼻，口感好滑又唔膩，甜味自然。紫米露配清心丸同腐竹馬蹄清心丸都值得一試。另外仲有得食唔少傳統台式甜品，如椰果檸檬愛玉、椰汁西米配包心芋圓同仙草紫草園等，好地道！

文: Yanica