睇樓逐呎度：名家匯巨廳+按摩浴缸=冇得輸
20160430
東網電視
更多新聞短片
4房連雙套房實用面積超過1700方呎。
去得旅行梗係想歎世界啦，浸吓Spa都不知幾爽皮，不過平時做嘢咁忙，點可能話飛就飛咁自由。想唔使搭飛機都隨時喺屋苑歎個靚Spa，今次逐呎度就帶大家去睇吓大圍豪宅名家匯嘅單位。單位最正係主人房浴室內有個圓形水力按摩浴缸，旁邊仲有弧形落地玻璃窗，欣賞風景之餘又可以瘋狂浸浴，一個字「爽」！但係女士們嘅話，切記要裝返嗰窗廉，小心畀人睇蝕呀...
今次逐呎度單位位於名家匯2座低層A室，實用面積超過1,700方呎，實用率約75%，係罕有嘅4房連雙套房開戶，亦係分層單位面積最大嘅一類。甫入單位大門，逾400方呎大廳即刻映入眼簾，足足等於1個迷你1房戶的室內空間，再配以高逾10呎樓底及落地大窗，盡顯大宅氣派。
主人套房是全屋焦點嘅所在，就算唔計主人浴室，面積都有逾200方呎，加上長約12呎的寬屏窗，除咗有足夠嘅透光度外，仲可以盡覽窗外美景。至於主人浴室分如廁區與淋浴區，地方闊落，最大亮點當然就係弧形落地玻璃窗，兼且度身配置嘅圓形水力按摩浴缸，住客可盡情享受沐浴嘅樂趣。
單位美中不足嘅係，細客房嘅窗位不足4呎長，室內略嫌暗淡。此外，單位有超長走廊，達17.51呎，拖低實用性。
大圍半山綠樹林蔭，私隱度極高，具備成為豪宅區嘅先天條件。位處其中的新進屋苑名家匯，更係近年該處嘅豪宅指標。屋苑入伙約5年，由兩座分層住宅物業及洋房組成，外形時尚簇新，好有新派豪宅Feel。
屋苑主攻換樓客市場，分層單位嘅實用面積逾千方呎，供應區內少有嘅4房連雙套房戶，加上屋苑備有7萬方呎住客會所，難怪成為大圍半山豪宅新貴。
美聯區域經理呂劍偉指，名家匯現時盤源充裕，4房戶約有18個買賣放盤，與上述間隔相若的戶型，入場價由2,150萬元起，屬貼市價盤。他續說，屋苑向來交投疏落，今年2月份錄得1宗4房戶銀主盤成交，以約1,938萬元易手，較市價有折讓。
─ ─ ─ ─ ─ ─ ─ ─ ─ ─ ─ ─
其他精彩新聞：新盤專輯：6新盤今混戰涉逾160伙 現場熱鬧
「東網Money18」fb專頁：有討論、有分析，齊來FUN享，贏盡●你Like