曼聯輸到慌　力斟33歲阿拿奧杜域救亡！

足球博彩神器，每日重心提供盡在《彩報》：http://win.on.cc/football/　

曼聯喺英超新球季第1擊就輸波，球隊上下面臨巨大壓力，領隊坦哈格賽後表示有必要再簽入新前鋒，據報曼聯睇中33歲奧地利前鋒阿拿奧杜域，呢位前史篤城球星曾被譽為「新伊巴謙莫域」，而且出道初期曾經跟坦哈格搵食，或可救曼聯燃眉之急。

曼聯主場1比2不敵白禮頓後，坦哈格表示收購前鋒係必要：「我唔會開名，呢個暑假已經有250個前鋒同曼聯扯上關係。我哋本來有2個半前鋒，拉舒福特都可以踢，不過佢更加適合踢左邊，可惜今場2個正式前鋒都未踢得。」

據報曼聯依家目標係博洛尼亞前鋒阿拿奧杜域，但首次開價750萬鎊已被拒絕，曼聯想要人就要加碼，呢位33歲前鋒嘅哥哥兼經理人馬高證實：「我哋收到一間知名球會嘅斟介，依家同博洛尼亞商討，睇下有冇機會實現。」阿拿奧杜域喺荷甲川迪出道，當時領軍嘅就係依家曼聯助教麥卡倫，而坦哈格就係當時副手，所以對呢位前鋒踢法並唔陌生，阿拿奧杜域上季喺意甲入14球，寶刀未老。