車仔將外借Kepa　仲要負擔75%人工

最強博彩盤路過關神器《串績王》：http://win.on.cc/football/　

車路士繼外借射手盧卡古畀國際米蘭之後，又準備再送多1位球員去意甲，英國《每日郵報》爆料，指車仔即將外借門將阿列沙巴拿加(Kepa)畀拿玻里，但仍然要負擔75%薪酬，遭網民嘲諷又做一單「最失敗交易」。

車路士2018年夏天以7,160萬鎊向畢爾包收購阿列沙巴拿加，成為史上最高身價門將，但呢位西班牙國腳上「車」後，表現欠佳，甚至試過拒絕前主帥沙利換走佢嘅安排，令人嘩然。

Kepa近年長居後備，佢為咗增加上陣機會，爭取入選西班牙國家隊，出戰今屆世界盃，所以提出轉會。據悉車仔已同意將Kepa外借畀拿玻里1季，借用費為125萬鎊，但車仔要負擔75%薪酬，Kepa現時周薪為15萬鎊。

由於拿玻里正選門將奧斯賓拿已經離隊，Kepa加盟呢支意甲勁旅，應該可以坐正。值得一提，拿玻里早前將中堅高列巴尼出售畀車路士，可能車仔因而「回禮」，以超筍條件外借阿列沙巴拿加畀拿玻里。