李城大勝驚嚇一幕　麥迪臣突頭暈18分鐘被換

最強博彩盤路過關神器《串績王》：http://win.on.cc/football/　

由歐霸盃「空降」嘅英超球會李斯特城，周五(18日)凌晨歐協聯淘汰圈附加賽首回合，主場出擊以4比1大勝丹麥球隊蘭達斯，不過輕鬆贏波背後亦有驚嚇畫面，中場占士麥迪臣後備上陣只踢18分鐘，喺冇爭逐情況下突然頭暈坐低，而且神情呆滯，要即刻入醫療室休息，好在目前情況良好。

李斯特城今場23分鐘由尼迪迪先開紀錄，客隊完半場前一度追平，不過李城下半場由哈維班尼斯、達卡同迪斯貝利賀爾連入3球，最終大勝4比1完場。今場先任後備嘅占士麥迪臣64分鐘落場，但只踢18分鐘就出現不適半攤喺場上，軍醫即刻入去為佢診治，並且提早退下火線直入醫療室，令人擔心佢嘅健康情況。

李城領隊羅渣士賽後透露：「麥迪臣只係覺得好唔舒服，突然出現頭暈，所以我決定換走佢，我(賽後)已經同佢交談過，佢話感覺良好。除咗唔舒服之外我唔清楚麥迪臣發生咩問題，我哋會再檢查搵出問題。」