美國新星起孖　諾域治勝出護級「6分波」

最強博彩盤路過關神器《串績王》：http://win.on.cc/football/　

周六(22日)凌晨英超護級大戰，賽前排尾3嘅諾域治作客以3比0大勝屈福特，並力壓對方，升上尾4，暫時逃離降班區。諾域治翼鋒祖殊沙根特今場梅開二度，並以21歲零335日成為英超史上第3年輕入波嘅美國球員，僅次於艾迪杜里、基斯甸普列錫。

雙方上半場互交白卷，換邊之後，諾域治發威，祖殊沙根特分別喺51及74分鐘建功。屈福特落後2球之下，仲有主力射手艾曼紐丹尼斯被逐，加上補時古卡擺烏龍，大敗0比3，屈福特自上年11月擊敗曼聯之後，近8場英超只有1和7負，已經跌入尾3降班區。

反觀，諾域治愈戰愈勇，取得英超2連勝，亦係球隊相隔840日之後，首次脫離英超最尾3位降班區。不過，諾域治只係領先屈福特2分，而且踢多對方2場，護級希望仍然唔樂觀。