唔係眼花！拜仁吞5蛋爆600倍波膽！

最強博彩盤路過關神器《串績王》：http://win.on.cc/football/　

周四(28日)凌晨德國盃第2圈出現驚嚇賽果，班霸拜仁慕尼黑作客慕遜加柏竟然大敗0比5，爆出600倍超冷波膽！拜仁慕尼黑出局之餘，亦寫下球會43年來最大敗仗。

拜仁慕尼黑今場並冇留力，包括羅拔利雲度夫斯基、基拿比、湯馬士梅拿等在內嘅正選「夫添」披甲，不過連續3場都大炒對手4球嘅佢哋，今仗風水輪流轉，開波2分鐘就被古奧迪亞干尼攻陷，踢到21分鐘已經輸到0比3。拜仁下半場繼續失魂，被比列安保路再入2球，最終狂吞5蛋出局。

拜仁慕尼黑對上一次輸5球或以上，已經要數到1978年12月德甲(1比7不敵杜塞爾多夫)，今場係球會43年來最大敗仗。拜仁教練拿高斯文因為確診新冠肺炎而要隔離，今仗暫代領軍嘅托比慕拿賽後表示：「祝賀慕遜加柏踢出精彩一仗，佢哋值得贏波，我哋好多部署都未能夠實行。我哋一直有同拿高斯文聯繫，包括制定戰術同出場陣容，今場敗仗唔係體系問題，只係經歷一個糟糕嘅夜晚，球隊要盡快重新振作。」