睇樓逐呎度：城市花園大平台最啱「汪星人」
20160904
東網電視
更多新聞短片
今次介紹北角城市花園嘅特色單位。
對於飼養貓狗嘅人嚟講，屋企地方唔夠大，真係好頭痛。就算自己唔瞓，狗仔、貓仔都要有地方瞓啦......有見及此，今期《睇樓逐呎度》帶大家參觀北角城市花園嘅特色單位，個平台面積接近1,500方呎，地方咁大，養隻世界上超大型犬之一嘅聖伯納犬都完全冇問題啦！但有唔少網民就話住平台單位其實係有風險，試諗吓，樓上嗰位日日咁扔垃圾落嚟，搞到個平台成個堆填區咁，都咪話唔慘慘豬...
今次同大家逐呎度嘅城市花園3房連平台戶，實用面積794方呎，實用率高近89%，行入單位即到L形嘅巨廳，面積高達300方呎，客廳長度逾18呎，擺放家具簡直隨心所欲；至於飯廳位相對較窄，但仍然長逾12呎，擺放8人餐桌綽綽有餘，大家庭「開餐」一樣夠坐。
不過，全間屋最大嘅亮點相信係近1,500方呎大平台，活動空間真係多到爆炸，想約埋班Friends燒嘢食，又或者畀貓貓狗狗跑吓、跳吓，自己順便做吓運動，認真健康人生呀！
3個房間亦都空間寬敞，尤其係主人套房面積偌大，未計浴室面積逾80方呎，擺放大床及衣櫃仍有充裕空間。另2個客房面積約70方呎，住得闊落。
樓齡30年的城市花園，是北角老牌大型屋苑，以實用率高見稱，加上附近社區配套齊全，長期有用家捧場。屋苑由14座大廈組成，提供逾2,400伙，坐落電氣道，由於鄰近英皇道及港鐵炮台山站，交通不愁選擇。另外，屋苑設有小型商場及會所，設施包括室內泳池、健身室及壁球場等，一應俱全，做運動話咁易。
世紀21日昇黃文龍指，上述三房類型單位入場費1,030萬港元水平，貼近市價，同類連平台單位則叫1,450萬元。他續說，英國脫歐後本港樓市氣氛轉旺，在用家加快入市下，屋苑交投備受帶動，本月至今錄8宗成交，屬今年最旺月份。
─ ─ ─ ─ ─ ─ ─ ─
香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95
樓市乍熱，想睇更多一、二手樓精彩故事，即click以下連結：
新盤置啱睇
二手置啱Feel