朱潔儀生日收99支紅玫瑰　認同追求者了解中！

「港姐畫家」朱潔儀9月6日生日收驚喜，她透露朝早瞓醒便收到一束99支紅玫瑰，99支玫瑰花語是長相廝守、天長地久，她笑言是異性朋友送的禮物，無想過花語意思，她說：「係咩？了解吓先啦！（打動你？）女仔收到花都好甜嘅，尤其係生日收，我又鍾意紅色。（有冇約你食生日飯？）我每年生日都同中學同學過，其中一個同我生日差幾日，會一齊慶祝。（追求者鬥唔過閨蜜？）我哋4個同學由細玩到大，的確係唔夠閨蜜鬥，哈哈！」

她透露家中的工人姐姐都好有心，專登買了很多紅色和粉紅色心形氣球，吹定送給她，而攝影師好友早前答應為她拍一輯女神照賀她生日，剛好用氣球做道具，她說：「我都叫啲朋友唔使送禮，依家疫情升溫，約食飯都唔使急，可以遲啲再食，加上有啲朋友唔喺香港，好似Isabel（梁佩瑚）都陪老公返咗蒙古。」她稱生日願望希望身體健康，開開心心，也希望可以出埠去旅行。