【香港行山】港島東行龍躍徑 到天涯海角 再入大浪灣
港島區一向係行山朋友最愛,因為多數起碼都位於市區,只要簡單坐車去到附近就可進入山徑範圍。今日介紹就係位於港島東一條好易去,但景色一絕嘅路線,就係龍躍徑+黑角徑路線,既寧靜又易行,沿途風景仲會不停轉換,非常適合耐唔耐想行一次山,但一次就想睇多種風景嘅朋友呢。
出發地點 藍灣半島
今次起點於小西灣藍灣半島附近海濱花園之內,想補給嘅朋友請於藍灣半島商場中買糧食及水,入面亦有餐廳可以先用膳再出發。走入海濱公園之後,往右手邊行到最盡,於海邊有一條石級緩緩而上,就係今次嘅起點,龍躍徑嘅入口。踏入龍躍徑再左轉進入黑角徑,一條路走,為政府規劃行山徑,有欄杆有扶手、石屎路,非常好行。
黑角徑賞對岸將軍澳
走於黑角徑上,左手邊一望無際係海景,對岸就係將軍澳藍塘海峽,呢條路係唔少住附近老人家每日晨運路線,既有海風又有樹蔭,相當好行。黑角徑嘅盡頭就係一座黑角頭燈塔,為正方形燈塔建築,為港島東船隻照明之用,影完相打完卡就可以回頭,原路折返龍躍徑。
直走大浪灣 經觀景台
近回龍躍徑之後,今次往路牌指示嘅「大浪灣」方向,呢條路全程石級,雖然唔算難行,不過樓級多,要行上中途站都有啲辛苦,沿途可以休息下飲下水。好不容易終於到達最頂砵甸乍山觀景台,觀景台上可以望到大半個維多利亞港景色,天氣好天色清的話仲可以一直望到對面飛鵝山山頂!
下坡往大浪灣
於觀景台睇完景休息過後,就可以前行往大浪灣,頭先上完山,終於可以開始落山,沿石級緩緩而下,中途見到涼亭「大浪亭」及歷史遺跡「大浪石刻」,如果第一次嚟嘅朋友都可以駐足欣賞一下,旁邊亦有詳細說明可以知道歷史背景。再行一會終於去到大浪灣沙灘,大可玩下水清涼一下手手腳腳,或者坐低感受一下海灘微風吹送,休息過後就可以再出發。
終點 哥連臣角
於大浪灣休息完之後,就可以去「港島徑」方向上行,一直行上去都係林蔭之中,頗為舒服。好快就會穿越至哥連臣墳場,一直沿樓梯往下走就會出返到柴灣市區,再自行乘車離去,完成今天旅程!
路線:藍灣半島>海濱公園>黑角頭燈塔>龍躍徑>砵甸乍山觀景台>大浪灣>哥連臣角>柴灣
全程:約6公里
需時:3小時(未計休息及觀賞時間)
難度:中級
來回交通:港鐵或巴士