TVB 55周年四大台慶劇名單出爐 打頭陣《美麗戰場》下週一首播

TVB喺噚日（26日）舉行《無綫電視55周年台慶亮燈儀式暨記者會》，宣布10月起播出嘅全新劇集及綜藝節目，過百藝員盛裝出席，場面盛大。喺亮燈儀式上，TVB率先揭曉今年55周年嘅4大台慶劇，包括《下流上車族》、《新四十二章》、《美麗戰場》及《超能使者》。

而打頭陣嘅台慶劇就係喺下星期一（3日）晚上9點半首播嘅《美麗戰場》，演員陣容方面就有緋聞情侶陳瀅和方力申、何依婷、劉佩玥、陳曉華、朱晨麗、蔣家旻和陳山聰等等，劇情主要圍繞幾位女角色之間為復仇而明爭暗鬥嘅故事，打造港版《Penthouse上流戰爭》。

《下流上車族》將於10月17日晚上8點半首播，演員配搭新鮮，搵嚟實力派演員鮑起靜、江美儀及林敏驄，再加上郭柏妍、羅毓儀及丁子朗等新晉演員出演。劇集以「上公屋」為主題，題材貼地，相信引起唔少觀眾共鳴。

《超能使者》將於10月31日晚上9點半首播，劇集卡士陣容強勁，由陳展鵬、唐詩詠、陳山聰、林子善、沈震軒、王君馨及劉穎鏇等人主演。劇集以「異能英雄」作為題材，主要講述陳展鵬及唐詩詠因一場交通事故受傷，康復後意外擁有超能力，化身成香港版正義同盟用超能力拯救市民。

最後一套台慶劇就係《新四十二章》，劇集搵嚟陳豪、龔嘉欣、譚凱琪、周嘉洛及江嘉敏等人主演，劇集主要講述主角們接通已死去嘅前人嘅記憶同埋潛能，而引發嘅一個個謎題。

除咗台慶劇之外，亮燈儀式上仲宣布10月起播出嘅全新綜藝節目，包括《星光匯聚成翡翠》、《霎時再感動》、《遊走世界天與地》、《黃金盛宴》、《全城一叮》、《我們的主題曲》及《香港小姐再競選》等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！