8月6日，來自英國利物浦嘅 Robert Pope，於愛爾蘭 Galway City 飲完一大杯健力士黑啤之後，就向東開始跑，經過215公里抵達愛爾蘭首府都柏林 (Dublin)，再飲一杯健力士黑啤完成旅程。就咁樣，Robert Pope 以23小時39分鐘完成橫越愛爾蘭壯舉 (時間有待核實)，有望創下健力士世界紀錄，更為 WWF 籌得逾2000英鎊 (約港幣20000)。
「英國阿甘」Robert Pope
Robert 略有名氣，佢一生熱愛跑步，2016年佢依照電影《阿甘正傳》嘅跑步路線橫越美國，用咗422日完成25,140公里，並寫書記錄呢件事，英國人稱佢為「英國阿甘」。
其後，Robert 都會著住阿甘服飾參加英國大大小小賽事，佢話:「我當年都係因為阿甘長跑情節而受到激勵，而我亦希望大家可以透過長跑運動而得到鼓舞。」
呢次要橫越愛爾蘭，原來 Robert 只係兩個月前先決定去馬，加上中途又有工作要處理，結果只係準備咗五個禮拜左右。好彩得到幾名素未謀面嘅支持者幫手，先可以完成壯舉。
據 Rober t團隊嘅了解，佢呢段路暫時未有官方完成時間，所以 Robert 應該開創歷史，待健力士世界紀錄核實，就有望成為正式紀錄。
資料: Running Magazine
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
